Edito

Partagé sur :
• facebook

Mipoitra tsikelikely ihany ny tandindon’izay mety ho fizotry ny fifidianana hatrehina amin’io taona ho avy io ary na dia hita ho samy miezaka manao izay

 mety hahafantaran’ireo olom-pirenena tsirairay avy ny fisiany aza aloha ireo rehetra mikasa ny ho kandida dia miezaka mafy manakona azy ireny kosa ny antokon’ny fitondrana sy ireo mpanara-dia azy ao anatiny ao. Efa teo ny fanakanana antoko matanjaka tsy hankalaza ny tsingerintaona nahaterahany nanerana ny faritra. Nanara-dia izany ny fikasana hikitika lalàm-panorenana amin’izao ora farany izao. Ny hetsi-panoherana rehetra nokasain’ireo mpanatanteraka izany ho atao moa dia nampiharana antsojay avokoa ary farany teo dia niaraha-nahita fa ny teo anivon’ny tontolon’ny fitsarana aza dia nisy savorovoro sy herisetra nitranga. Tokony havela hiasa am-pitoniana, hono, aloha ny fitondram-panjakana sy ny vahoaka malagasy. Mankato io fiaraha-miasa io anefa ve ny vahoaka maro an’isa ary iza no tena mahazo tombony ao anatiny ? Sao dia ny mpitondra no miha voky sy miha bolangina fa ireo vahoaka miha mitrongy vao homana ? Firy isan-jaton’ny fihetsiketsehana natao teto moa no nomena alalana ? Tany demokratika tokoa ve i Madagasikara ? Santionana fanontaniana ihany ireo ahafahan’ny mpitondra mandinika ny tena tokony hataony manoloana ny zava-miseho. Inona indray koa izany izao no ho ao ambadik’ity hoe firosoana amin’ny fanalana ireo mari-drefin’onjampeo tsy ara-dalàna ity ?

J. Mirija

Tia Tanindrazana

Samia mijoro ho an'i Gasikara.