Edito

Partagé sur :
• facebook

Vaovao anisan’ny nanamarika ny herinandro ny tranga tetsy Mahamasina hatreto.

Teo ihany ny vokatra azon’ny ekipam-pirenentsika eo amin’ny taranja baolina kitra izay tsy ratsy saingy ratsy dia ratsy kosa ny tranga niseho teny an-toerana ny alahady teo. Maro ireo malagasy naratra ary nisy namoy aina mihitsy aza. Fanim-piriny tamin’ny hetsika ara-panatanjahantena sy hetsika natao tao amin’io kianja io moa iny notanterahina ny alahady teo iny ? Dia tsy nisy lesona azo notsoahina tamin’ny tandrametaka tany aloha mihitsy ve no dia mbola misy toy ireny foana hatramin’izao ? Manimba ny sain’ny mpanara-baovao ilay izy ary tsy vitsy ireo latsa-bava fa misy kandida mila sorona amin’ny fifidianana indray angamba any. Tsy in-dray mandeha tsy in-droa no efa nisy ra mandriaka niraraka tetsy Mahamasina fa efa maromaro ary zary mitady ho lasa isan-taona mihitsy. Ndrao lahy iniana atao mihitsy ilay fampitavozavozana, sanatria ! Ny mahagaga dia saika efa nitrangan’ny toe-java-mampihorikoditra tahaka iny ireo hetsika natao tao. Ny mahalasa saina, angaha moa tsy misy hampisahanina azy ny fitantanana ny kianja toy itony ? Tsy mbola fantatra ihany ve hatramin’izao ny fetr’isan’ny toerana ao anatiny ao ary tsy mbola hay tsianjery foana ny fomba fiasa hitantanana ireo mpijery ? Nankaiza ireo fiara fitaterana traboina no dia nasisika tanatina fiara tery dia tery ireo naratra ? “Soa lavo hahay hamindra, soa kenda hahay hitsako”, hoy ny Nataolo. Ny hirariana dia ho lasa amin’iny ny ratsy rehetra ary hitohy hatrany amin’ny fotoam-pifidianana rehetra ny tsara.

J. Mirija

Tia Tanindrazana

Samia mijoro ho an'i Gasikara.