Edito

Partagé sur :
• facebook

Na ny mpitondra na ny vahoaka na ny mpandraharaha na ny mpitondra fivavahana na ny mpanao politika …

 rehefa Malagasy dia mahontsa ny manam-panahy ny mijery azy ankehitriny, mahonena daholo. Mety tsy ho rototra ny “manan-tsaina” satria mihevitra azy ireo ho tena izay tokoa ary tsy tonga ao an-tsainy akory fa tompon’andraikitra amin’ny fisondrotam-pahantrana iainana mandavan-taona ny sasany amin’izy ireo. Mahonena satria mitovy tsara ny tadin-dokanga manoloana ny fitiavana manao resabe mandany jiro lava izao fa rehefa tairina kosa andeha havadika hetsika amin’izay ireny resaka nifanaovana ireny dia saika mihemotra ny ankamaroany ary maro aza ny milaza indray hoe tsy mety izany. Dia tsy mahagaga raha milaza ny mpitondra fa maika ny fampandrosoana nefa ny fihetsika sy ny hetsika atao toa tsy manaporofo izany akory fa mandiso aza. Tsy ny aretina pesta ihany no taratry ny fihemorana nisy teto amin’ny firenena fa teo ihany koa ny fiverenana tamin’ny fampiasana bileta tokana rehefa fifidianana izay mbola ahiana hiainana amin’ny taona 2018. Ohatra hafa mahamenatra ihany koa saingy heverina fa ilaina ny mamerina azy sao mba hisy fahagagana ka hiteraka fahatongavan-tsain’ny tsirairay ihany dia ny hoe mbola mila fampianarana be foana eto amintsika amin’izao fotoana izao ny fomba fidiovana sy fitandroana ny fahadiovana. Ny tena mampalahelo dia ny mahita antsika mianakavy mihevitra ny tenany ho zavatra hatrany rehefa afaka “mampirevy” kanefa dia hararaotin’ny mpifanolo-bodirindrina avy eo rehefa mivarilavo.

J. Mirija

Tia Tanindrazana

Samia mijoro ho an'i Gasikara.