Edito

Edito Mahagaga sy maha lasa… saina

Edito
Talata 21 Aogositra 2018

Andrasana anio ny isan’ireo « te » ho filoham-pirenena nanatitra ny dosie ahafahany mirotsaka ho kandida.

Tsy maintsy hisy ny sivana mbola hataon’ny avy eo anivon’ny fitsarana avo momba ny lalàmpanorenana izay afaka hifaninana amin’ny 7 novambra ho avy izao. Ny mahagaga sy maha lasa… saina dia hifandrombahan’ny mpanao politika ny mirotsaka tato anatin’ny 5 taona izao ity fifaninanana hahazo an’Iavoloha ity. Fony tsy nisy antso natao ho amin’izany anefa dia hita ho mitetika pirina sy mamaofy akotry avokoa nanampy ny mpiara-belona sy ny fiarahamonina misy azy. Raha atambatra ireo 50 tapitrisa ariary isak’ireo kandida ka nananganana zavatra hafa dia efa azo antoka fa mba farafaha ratsiny nametraka ity nosy ity tamina toerana avoavo kokoa noho izao na dia tsy ho sangany aty afrika aza. Mahavita manipy vola eny an-davarangana sy eny am-baravarankely ny ankamaroan’ny mpanao politika malagasy kanefa ny famaritana ny atao hoe politika aza tsy hain’ny ankamaroan’izy ireo akory. Nanao fanambarana hilatsaka ho filoham-pirenena izao ny sasany dia mbola sahy milaza ihany fa tsy mpanao politika. Iny indray kosa aloha dia azo lazaina ho tsy mahagaga raha mahatonga tsy fahatsapan’izy ireo ho tompon’andraikitra amin’ny vahoaka sy ny mpiara-belona aminy toy izay hita miharihary ankehitriny. Azo antoka anefa izao fa tsy hisy hilaza na ny iray aza ireo nametraka dosie ireo hoe mpikarama an’ady na dia fihetsik’olona toy izany aza no hasehony miharihary ankehitriny. Mahagaga sy maha lasa saina.

J. Mirija