Edito

Partagé sur :
• facebook

Mahatratra 42 248 ha ny faritra arovana any amin’ny faritra Alaotra iny. Mampalahelo anefa fa misy namadika ho tanimbary sahady ny 480ha amin’izany izay ao amin’ny tapany andrefan’ny faritra Alaotra. Ao amin’ny fokontany ........

Sampananefatra kaominina Ambatomainty distrikan’Amparafaravola no tena betsaka potika ny zetra. Nisy sahy nanao borinazy ilay toerana arovana ka nahatonga ny avy ao amin’ny Durell Alaotra niantso ireo vondrona olona ifotony handray ny andraikiny. Nambaran’ny tomponandraikitry ny Durell Alaotra Rasolonjatovo Bary Jean fa hisy ny fidinana ifotony hametrahana balizy izay mamaritra ireo faritra arovana sy ny azo trandrahana. Fantatra fa betsaka ny bornazy tsy manara-dalàna ka tokony handraisana fepetra. Nisy ny fivoriana lehibe notanterahina tany Ambatomainty nikatsahana vahaolana amin’io fahasimbana ny zetra io. Nitarika izany ny lehiben’ny distrikan’Amparafaravola, ny ben’ny tanàna Ambatomainty sy ny avy ao amin’ny sampandraharahan’ny tontolo iainana Alaotra Mangoro ary ny Durell Alaotra sy ireo fikambanana samihafa izay mitonona ho mpitantana ny zetra. Nivoaka tao anatin’io fivoriana io fa misy amin’ireo fikambanana mitonona ho mpitantana ny zetra no tsy manara-dalàna satria tamin’ny alalan’ny hitsivolana 60.133 no nananganana izany raha tokony ho ny hitsivolana avy eny amin’ny sampandraharahan’ny tontolo iainana 2.027 no hanaovana izany. Efa betsaka ny voka-dratsy nateraky ny fahapotehan’ny zetra toy ny tanimbary ngazana any Amboavory. Raha tena hitsinjo ny taranaka any aoriana marina, hoy ny avy ao amin’ny Durell dia mila hamafisina ny fiarovana ny zetra any Alaotra.

Tia Tanindrazana

Samia mijoro ho an'i Gasikara.