Edito

Diso paikady ?

Edito
Alatsinainy 13 Aprily 2015

Mandroso mihemotra ! Izay no azo ilazana ny zava-misy eto amintsika raha ny raharaham-pirenena no resahana, indrindra moa fa ny politika.

Midika izany fa mbola ho lavitra ny fivahan’ny krizy, ary ny manahirana dia toa ireo mpitondra fanjakana mihitsy no mamorona olana hampitarazoka hatrany ny fifandaminana eto. Natao ny fampihavanam-pirenena, efa maro ny zavatra nifampiresahana tao na dia tsy mbola nisy aza ny fehin-kevitra navoaka. Toa miverin-dalana anefa isika izao, mitady hiverina indray ilay fampiasana ny herim-pamoretana, hifehezana ny tsy mitovy hevitra amin’ny tena, na ireo izay heverina fa mety hahazaka vahoaka amin’ny fifidianana. Maro no mahita fa ho sahirana ny fitondram-panjakana raha tsy mahay mitantana ny raharaha Ravalomanana satria ny tena mety hankahalain’ny olona ary ny seza mety hihozongozona ihany koa. Asa moa izay tena paikadin’ny mpitondra fanjakana momba ity raharaha ity ! Tsy fantatra ny politika avo lenta any ambadika any fa ny azo antoka fotsiny dia manaratsy endrika ny fitondran’ny HVM ny antsojay atao amin’i Marc Ravalomanana, ary mety hivadika zavatra hafa ho an’ireo mihevitra azy fa manampahefana … atsy ho atsy !

RTT