Edito

Aza dedaka e !

Edito
Talata 28 Jona 2016

Tokony handinika lalina tsara aloha ny mpitondra Malagasy mialoha ny hampiantranoana fivoriana iraisam-pirenena eto fa raha ireny zava-nitranga teny Mahamasina ireny dia mampiahiahy ny fitandroana ny filaminana.

Tsy resaka fanakianana be fahatany na tsy fitiavana ny hisian’ny fivorian’ny Comesa sy ny OIF eto fa zava-doza ary tena hanaratsy endrika tanteraka an’i Madagasikara raha sanatria misy tandrevaka ny resaka filaminana sy harofenitra mandritra ireo fihaonan-dehibe iraisam-pirenena roa ireo. Efa hita mantsy izao fa misy zavatra tsy milamina eto, misy olona te hanakorontana. Sahirana ny mpitandro ny filaminana ary tsy vonona tsara hiantoka 100% ny filaminana amina hetsika goavana tahaka ny teny Mahamasina. Tsy misy azo ialana anefa ny zavatra tahaka ireny fa vao maraina mandrapahatapitry ny lanonana no tokony ho hentitra ny fitandroana ny filaminana. Matoa nisy olona afaka niditra tao anaty kianja, nanakaiky ny lapihazo ka nanapoaka grenady dia nisy tandrevaka be ny fiambenana izany, mazava tsy mila adihevitra be intsony io. Ka izany ve no hampiantrano filoham-panjakana efa ho 80 ao anatin’ny 3 andro raha tena raikitra eto marina ny fihaonana an-tampon’ny Frankôfônia ? Ny resaka dahalo tsy mbola milamina, ny fakana an-keriny tsy hita izay tena marina, ny fiambenana sy fiarovana tsy voafehy, sao lahy hanalabaraka a ! Mba diniho tsara ihany fa aza dedaka e !

RTT