Edito

Aza asiana tombo sy hala e !

Edito
Alatsinainy 10 Aprily 2017

Mafampana ny raharaha kolikoly avo lenta mahasaringotra ilay vehivavy mpanolotsain�ny filoha.

Samy mitodika any sain’ny vahoaka ary maniry ny tena hampiharana ny lalàna fa tsy sanatria ka hipoitra indray ny hevi-petsy hamotsorana ny trondro vaventy efa tra-tehaka toy izao. Dia samy miandry ny rehetra hoe inona no hipoitra ? Efa re iny ny fanambaran’ny Bianco fa tsy hanaiky lembenana ary hijoro hatramin’ny farany, ary efa navoakany mihitsy ny ampahany tamin’ny dosie maloto. Efa nanamafy ny azy ihany koa ny fitsarana fa hijery akaiky ny raharaha, ka hampihatra an-tsakany sy an-davany ny lalàna. Samy fampanantenana ny vahoaka avokoa izany fa hijoro amin’ny ara-drariny sy hitana ny teny nomeny avokoa ireo sampa-draharaha voakasik’ity raharaha henjana ity. Ankilany kosa, dia mijoro sy mitady hirika fatratra hanafahana ity vehivavy malaza ratsy ity ny ankolafy misy azy, izay mbola tompon’ny fahefana sy ny hery aloha hatreto. Efa mandeha ny tsindry isan-karazany, saingy tsy te hahalala izany maro fa aleo hihatra ny lalàna, ka tsy ny mpangalatra akoho, mpampianatra nikasi-tanàna mpianatra sy ireo nanao heloka madinika ihany no higadra. Dia manantena izany ny rehetra fa tsy handaitra intsony ny mikimaky amin’ity raharaha ity. Aleo samy hibaby ny helony ny rehetra mba hisian’ny fifampitokisana e !

Toky R