Edito

Ao an-dapa ny mpamingana ?

Edito
Alarobia 25 Janoary 2012

Maro amin'ireo mpanohana ny filohan'ny tetezamita Andry Rajoelina no sosotra sy nimenomenona vantany vao nahafantatra fa nanaiky ny fanasan'ny Troikan'ny SADC hanatrika ny fivoriana any Pretoria izy.

Ary na tsy nandeha mivantana aza izy tenany dia nandefa solontena roa, dia Atoa Norbert Lala Ratsirahonana, mpanolotsaina manokan'ny filohan'ny tetezamita sy Rtoa Annick Rajaona, talen'ny fifandraisana iraisam-pirenena ao amin'ny fiadidiana ny fitondrana tetezamita. Samy olona akaikin'i Andry Rajoelina ireo, ary samy malaza ho miseho katraka ao Ambohitsorohitra ao. Tsy ny mpanohitra no milaza izany fa ireo mpiasa sasany ao an-dapa ihany, ary na minisitra aza dia misy velon-taraina amin'ny fomba fiasan'ireo olona ireo. Manahy, araka izany, ireo mpomba ny filohan'ny tetezamita fa sao hanondrana any Pretoria any i Tonton Norbert sy Madama Annick ! Itsy voalohany moa dia efa malaza amin'ny fanonganana filoha sy fanandratana filoha vaovao, ilay faharoa kosa, na dia manampahaizana momba ny fitantanan-draharaham-panjakana aza, dia tsy mbola ampy traikefa amin'ny politika, ary ambaran'ny olona sasany fa diso mihanta loatra amin'Andriamatoa Filoha.

Ny mampanahy ny mpanaradia an-dRajoelina ihany koa dia ny hoe : manana ny AVI antokony anie Atoa Ratsirahonana e ! Azo antoka fa tsy maintsy hijery ny tombontsoan'ny antokony aloha izy, izay vao hieritreritra ny TGV sy Andry Rajoelina. Mipetraka eto ny fanontaniana hoe : fa nankaiza daholo ireo mpanao politika nanohana ny FAT hatramin'izay ? Efa tsy misy manampahaizana sy mpanao politika afa-tsy Ratsirahonana intsony ve azon’ny filohan'ny tetezamita hianteherana ? Mazava mantsy fa adihevitra politika no hatao any Afrika Atsimo, ka tsy vitan'ny teknisianina fotsiny. Mitombina ihany ve ny resaka tetsy sy teroa hatramin'izay hoe tena misy mamingana Atoa Rajoelina, ary ny mpiara-miasa aminy ao an-dapa ao ihany no manao izany ?

RTT