Edito

Partagé sur :
• facebook

Inona intsony moa izany no maha filoham-pirenena na maha praiminisitra sy izay rehetra mitantana ity firenena ity ?

 Ny eo ambany fahefana rehetra efa mifaninana manda baiko daholo ary na ilay fisondrotan-karama 8% hamonoana afo faramparany aza efa hihomehezan’ireo tambazana handray azy fotsiny, raha ny porofo hita maso tamin’ny alalan’ny kianjan’ny 13 mey hipoka tanteraka omaly. Ny tena tsy nampoizin’ny mpanara-baovao, indrindra ny mpitondra, dia ireo mbola nantenain’ny filoha faratampon’ny foloalindahy fa hobaikony hamoritra hatramin’ny farany ny mpiray tanindrazana aminy indrindra no niala an-daharana voalohany. Toy ny maha lasa saina ihany ny fanehoan-kevitry ny mpahay fiarahamonina iray raha nilaza fa mijery ny tantaran’ny tafika ary lojika ny fihetsiny raha nandray fepetra ny tsy handatsa-dra mpiray tanindrazana intsony satria fantatr’izy ireo fa maika hampiitatra krizy izany. Toa milaza an-kolaka izany hoe tokony haka lesona amin’ny fihetsiky ny tafika koa ny mpanao politika sy ny mpisehatra hafa rehetra ka tsy hamerina izay efa tsy nety tany aloha tany intsony. Iza moa no mpanara-baovao tsy tsikaiky nahita ny filoham-pirenena ankehitriny nangataka tehaka matetitetika tamin’ireo vahoakan’i Faratsiho tamin’ny herinandro ? Miharihary ankehitriny fa na dia ny toerana hametrahan’ny filoham-pirenena ny tongony aza efa mila tsy ho hitany intsony kanefa dia mbola sahiny ihany ny milaza fa tsy mitsoaka ady izy. Tena niady tokoa ve sa nandrangitra ady tamin’ny Valalabemandry ? Andrasan’ny rehetra mba hanaja tena ka hivoaka amin’ny varavarambe izay avy nidirany, araka ny nambaran’ireo ankolafin-kery samihafa ombieny ombieny sisa ity ny filoha.

J. Mirija

Tia Tanindrazana

Samia mijoro ho an'i Gasikara.