Edito

Partagé sur :
• facebook

Efa nisy tsirim-panantenana ny ahitan’i Madagasikara ny anjara masoandrony amin’ny fanarenana ny toekarem-pirenena sy famerenana ny fitokisan’ny mpamatsy vola, indrindra tamin’ny nahavitana ny ampahany betsaka tamin’ny tondrozotra.

 Ankehitriny, miverina ho maizina indray ny hoavin’ny  firenena noho ny fikorontanana anaty. Vao omaly no naneho  ampahibemaso ny  ahiahiny indray ny banky afrikanina ho an’ny fampandrosoana ny amin’ny tsy  fisian’ny fitoniana  eto amin’ny firenena ka mahatonga ireo mpamatsy vola misalasala amin’ny fanampiana an’i Madagasikara. Mitombina  ny ahiahin’ny mpamatsy vola satria raha hanangana orinasa eto  Madagasikara dia tsy  ho azo antoka  mihitsy ny fanajan’ny  fanjakana misy  atao fifandimbiasam-pahefana.  Raha miova ny  mpitondra dia  miova koa ny sata. Tsy  misy  ny fitohizan’ny  fitantanana  ary io olana  miseho  amin’ny tanin’i  Dada Ravalomanana io no ohatra mitohoka amin’ny  tendany ny fakan’ny  fanjakana  an-keriny ny tany. Dia  iza no mpamatsy vola  hanorina zavatra eto ka hanaiky  hatao toy izany ? Etsy an-kilany, ny  praiminisitra lehiben’ny  governemanta midradradradra ny  fanajana ny lalàna sy miantso  mpamatsy vola kanefa  hanaovana  ramatahora sy fanamparam-pahefana ny  orinasa Tiko. Mijery antsika izao tontolo izao ka raha ny zava-misy dia efa  mahazo  manamboatra saina  isika Malagasy fa tsy hisy olona hiditra hampiasa vola amin’ny  tany izay anjakazakan’ny mpitondra  fanjakana  mpibodo  tanin’olona sy mpanao kolikoly toy izao mihitsy.

Rabri

Tia Tanindrazana

Samia mijoro ho an'i Gasikara.