Edito

Aleo mifandamina e !

Edito
Zoma 29 Mey 2015

Na dia eo aza ny hambom-po sy ny maha izy azy ny tsirairay dia tokony samy hahatsapa kosa fa tsy misy manana ny marina 100%. Izay no mahatonga ilay hoe tsy maintsy mifampiresaka mba hikarohana ny vahaolana, mba

hivoahan’ny marimaritra iraisana. Mety tsy hahafa-po ny an-daniny sy ny an-kilany izany, kanefa izay no fomba hendry indrindra hamahana ny olana. Daroka baomba nokleary nataon’ny Amerikanina ka nahafatesan’olona hatrany amin’ny 300 000 tao anatin’ny iray andro no nampilavo lefona ny japoney tamin’ny ady lehibe faharoa ; i Etazonia anefa avy eo no nanampy an’i Japon mba hiarin-doha. Mafy ny fampijaliana nataon’i Alema tamin’i Frantsa fony nitantanan’i Hitler ; tahaka ny rano sy vary miara-dia hatrany anefa ny firenena roa tonta amin’izao fotoana. Tsy resaka fanadinoana ny fangirifiriana sy ny fampijaliana niainana fahiny ilay izy na fanaovana tsinontsinona ny ra latsaka noho ny tolona natrehana, fa tsy maintsy mivoatra manaraka ny vanim-potoana ny fomba fijery, ny fifandraisana sy ny fiaraha-miasa ka ny tombontsoa iombonana no mibaiko ny an-daniny sy ny an-kilany amin’io. Raha mbola azo atao ny miresaka mialoha ny ady na fifamonoana dia aleo miresaka sy mifandamina e !

RTT