Edito

Partagé sur :
• facebook

Sady mahatsikaiky no miha mampalahelo hatrany ny tontolo politika eto Madagasikara.

 Toy ireny afa-panadinana ireny mihitsy angamba no nandraisan’ny ankamaroan’ireo 36 mianadahy tsy voasivana tamin’izy 46 isa mahery nanatitra sy saika hanatitra antontan-taratasy teny amin’ny HCC nifarana ny talata teo. Toy ireny fihazakazaky ny olom-pirenena maniry ny hifaninanana hidirana ho mpiasam-panjakana ireny ny firohotr’ireo nirodorodo nanitsaka ny varavaran’ny fitsarana avo momba ny lalàmpanorenana nanomboka ny 5 aogositra. Tao ireo  nahatitra mialoha. Tao ireo teny an-tenantenany. Tao ireo namarana ary nisy tamin’izy ireny aza no voarindrim-bavahady mihitsy. Ny ombin-tsarety indray no tafiditra fa izy ireo taraiky, hoy ny vazivazin’ny mpandalo. Ambangovangon-javatra daholo anefa izany fa ny tena votoatin’ny fanapahan-kevitra kosa dia mistery hatreto. 1 andro taorian’ny fiafaran’ny fanaterana dosie ! Haingana ny fomba fiasan’ny andrim-panjakana dia efa nivoaka sahady ny lisitr’ireo kandida avela handray anjara. Efa voadinika avokoa ve ny loharanom-bolan’ireo kandida ? Ampy nijerena ny antsipiriam-piainan’izy mianakavy ve izay tapa-bolana ? Toa efa tandindon’iny zava-nitranga iny ihany anefa ny sary niseho koa tamin’ny fanadinam-panjakan’ireo kilonga. Aiza ho aiza amin’ilay fehezanteny grika hoe “Duralex, sed lex” na hoe “mafy ny lalàna saingy izay aloha ny lalàna” ny foto-dalàna ampiainana antsika ankehitriny ? Hita ho mbola marefo avokoa. Tsy ny lalàm-pifidianana ihany fa hatramin’ny lalàmpanorenana voafidy tamin’ny alalan’ny karnem-pokontany.

J. Mirija

Tia Tanindrazana

Samia mijoro ho an'i Gasikara.