Edito

Adin�ny kanosa !

Edito
Alakamisy 15 Desambra 2016

Tsy manomboka akory ny ady dia efa mipararetra ny fanjakana ankehitriny.

Tetehin’izy ireo mafy ny handresy tsy miady amin’ny alalan’ny sakantsakana atao amin’ny mpifanandrina amin’ny tena tsy ho tonga eo ambony ringan’ny fifidianana. Kotrehina avokoa ny fomba rehetra hanilihana ireo kandida atahorana mafy satria efa fantany fa tsy ho lany izy ireo raha mbola misy ny salovan-tavan’ireo olona azo hambara ho matanjaka ireo. Raikitra sahady ny fivadiham-pitokisana tamin’ny fepetra napetraky ny mpamatsy vola amin’ny tokony hisian’ny fitoniana politika eto amin’ny firenena. Anisan’ny tena nivoitra ny hanaovana fifidianana malalaka sy mangarahara hahafahan’ny rehetra mirotsaka saingy efa izao manao adin’ny kanosa izao sahady ny fitondrana HVM. Nampidingin-drambo an-dRajaonarimampianina sy ny ekipany ny fampanantenan’ny mpamatsy vola hampindrana volabe 10,2 miliara, ka vao mainka mahazo vahana indray ny fananganam-pahavalo sy fihantsiana ady ankitsirano. Tsy takatry ny sainy ve hoe tsy mivoaka ny vola rehefa tsy feno ny fepetra ? Mihevi-tena tsy ho tratry ny aloka ny fitondrana ankehitriny ary manasokajy ny hafa ho dondrona sy kentrina, ka hanaiky foretina lava eto. Mbola minia mangina aloha ny rehetra hatreto, saingy ny voay handrapaka tsy mba mampiomana, ary fomban’ny kanosa no mody manangam-bovona. Ny ampitso no hamaritra ny ho tohin’ny tantara !

Toky R.