Dossier

Tsy fananan’asa eto Madagasikara Mitombo hatrany isan-taona

Dossier
Talata 02 Oktobra 2018

400 000-500 000 eo ny tanora mivoaka amin’ny fampianarana isan-taona saingy tsy maharaka ny tsenan’ny asa ka mahatonga ireo tsy an’asa marobe.

Mifanohitra tanteraka any amin’ny firenena eoropeanina ny zava-misy satria mihena hatrany ny tahan’ny tsy fananana asa any an-toerana. I Italia dia nahavita nampidina ny taha ho 10,2 % tamin’ny jolay ary 9,7 % tamin’ny aogositra farany teo. Nisy fiantraikany tamin’ny zone Euro ankapobeny mihitsy satria lasa 8,1% ny salanisan’ny tahan’ny tsy fananana asa ao amin’ireo firenena mikambana ao ireo araka ny tatitry ny Ofisy eoropeanin’ny Statistika (Euro stat) omaly alatsinainy 1 oktobra. Nanambara mihitsy izy ireo fa tsy nisy ohatr’io nandritra ny 10 taona farany satria nihena isan-taona ny mpitady asa tany nandritra izay fe-potoana izay. Eto Madagasikara anefa, 15% be izao ny tahan’ny tsy fananan’asa (taux de chômage) eto Madagasikara ary ireo tanora no maro an’isa, 3,5% ho an’ireo latsaky 25 taona araka ny tatitry ny birao maneran-tany ho an’ny asa (B.I.T). Tsy misy anefa ny politika mazava ataon’ny fanjakana ananan’ny tanora asa. Maro be ireo tanora manampahaizana manao ny asa tsy mifanaraka amin’ny mari-pahaizany akory. Ankoatr’izay, mbola tena olana ny havitsian’ny orinasa ka tsy mahasehaka mihitsy ireo tsy an’asa maro be eto amin’ny firenena.

Tsirinasolo