Dossier

Tetibolam-panjakana 2019 Raima sy valo ny fandaniana azy teny Tsimbazaza

Dossier
Alatsinainy 02 Desambra 2019

Nolanian’ireo solombavambahoaka rehetra teny Tsimbazaza tamin’ny fomba tsotra sy maika ny sabotsy hariva teo ny Volavolan-dalàna

laharana faha-005/2019 tamin’ny 30 oktobra 2019 momba ny lalàna mifehy ny fitantanam-bolam-panjakana ho amin’ny taona 2020. Nialohavana fampahafantarana ankapobeny nataon’ny minisitry ny toekarena sy ny fitantanam-bola ny fampandaniana. Navoitra ny maha zava-dehibe ireo fototra iorenan’ny Drafitry ny Fisandratan’i Madagasikara, dia ny lafiny ara-tsosialy, ny fitantanana ary ny toekarena. Ny 39.57%-n’ny tetibolam-panjakana dia natokana ho an’ny lafiny ara-tsosialy, 30,3% ho an’ny seha-pamokarana, ary ny 21,07% eo amin’ny sehatry ny fotodrafitrasa. Tsy tena hita taratra be ireo tetikasa goavana, toy ny Tanà-masoandro,… Vinavinaina ho 5,5% ny fitombon’ny harin-karena, ary 6,2% ny fisondrotry ny vidim-piainana amin’ny taona 2020. Io taha-pisondrotan’ny vidim-piainana io dia heverina fa hihena miandalana hatramin’ny taona 2023, ary ny fampiasam-bola kosa na ho an’ny fanjakana na ny tsy miankina dia hatevenina mba hanosehana ny fandrosoana. Ny fanatsarana ny taham-pampidiran-ketra, izay vinavinaina ho 11,5%, no anisan’ny fomba hoentina manatratra ny tanjona kendrena. Ny lanjam-bidy amin’ny fadin-tseranana mahakasika ny bolabolan-tsavony, ohatra, dia notanana ho 10% toy ny taloha, raha toa ka 20% ny tahan’ny haban-tseranana noheverina noraketina tao anatin’ity volavolan-dalàna mifehy ny Fitantanam-bolam-panjakana 2020 ity. Tsiahivina fa 7,0% ny tahan’ny fiakaran’ny toekarena hatramin’ny 2023, kanefa efa 7,31% izany talohan’ny fanonganam-panjakana tamin’ny 2009. Taorian’ny Antenimieram-pirenena nandany maimaika, dia hodinihin’ny antenimierandoholona indray ity volavolan-dalàna ity, izay ahiana ny mety tsy hahalany azy etsy Anosikely. Tratry ny fahirano ny antenimierandoholona, raha ny fahitana azy. Raha maherin’ny 50miliara ny tetibola hampihodinana io andrim-panjakana io teo aloha, dia manodidina ny 5 miliara ariary sisa, raha ny voafaritr’ilay tolo-dalàna. Hihamafy ny adin’ny samy andrim-panjakana, ary hizotra amin’ny didy hitsivolana (ordonnance) amin’ny fampananan-kery azy io ny Filoha, raha izao no mitohy.

Toky R