Dossier

Partagé sur :
• facebook

Manomboka indray ny atrikasa etsy sy eroa eto Madagasikara indrindra amin’izao fahataran’ny firenena Malagasy amin’ny fampandrosoana izao.

 Efa nisy ny fampahafantarana ny laharam-pahamehan’ny tanjon’ny fampandrosoana ho lovain-jafy (ODD) izay niarahana tamin’ny Fandaharan’asan’ny Firenena Mikambana ho amin’ny Fampandrosoana (PNUD) sy ny Ministeran’ny Atitany sy ny Fitsinjaram-pahefana. Tsiahivina fa nanomboka ny taona 2015 dia niditra tamin’ny vinam-pampandrosoana ODD izay manana tanjona 17 ary iraisan’ny firenena mpikambana ao amin’ny Rafitry ny Firenena Mikambana i Madagasikara. Arahamaso sy tarihina lava I Madagasikara. Tany amin’ny Faritra Atsimo-Andrefana, Menabe, Androy ary Anosy izao dia nisy hatrany ny atrikasa natao. Tanjona ny hampidirana ireo faritra resy ara-toekarena ireo hisitraka ny politikan’ny fampandrosoana eny ifotony ka hipaka amin’ny filàn’ny mponina marefo mihitsy izany hatramin’ny taona 2030. Narafitra mba ho hitan’ny sehatra iraisam-pirenena indray ireo heverina ho mainka indrindra ary mifanaraka amin’ny ilaina amin’ireo tanjona 17.  Hatreto aloha dia iaraha-mahita ny tsy fahaiza-mandrindra sy ny tsy fahatrarana ireo tanjona ireo fa variana hatrany tamin’ireny atrikasa sy ny resaka ambony latabatra marobe ireny fotsiny I Madagasikara. Mampametram-panontaniana hoe ho tratra indray ve ny tanjon’ity ODD ity amin’izao fitondrana vaovao izay mirehareha fatratra izao. Sa hanomboka indray ny atrikasa maro sy teoria isan-karazany izay tsy hitondra n’inona n’inona ho an’ny vahoaka Malagasy Ny zavatra tsapa aloha dia raha mihaino ny fidinginan-drambo sy ny fizahozahoanan’ny fitondrana dia ho mora mihitsy amin’ny firenena Malagasy ny hahatratra ireo tanjon’ny fampandrosoana ireo.

Tsirinasolo

Tia Tanindrazana

Samia mijoro ho an'i Gasikara.