Dossier

Partagé sur :
• facebook

510.357 ha no ala efa ripaka eto Madagasikara, araka ny tatitry ny Alliance Voary Gasy (AVG).

Tena manapaka ala ny Malagasy ary tsy mifidy fa lasa hatramin’ireo hazo sarobidy. Mifanindran-dalana amin’ny tondron’ny kolikoly izany ary rariny  raha faha-155 amin’ny firenena 180 ny Malagasy. Kolikoly no ivoahan’ireo ala sy hazo sarobidy ireo ka mahatonga ny laharana mihemotra hatrany nanomboka tamin’ny tetezamita no ho nankaty. Tsiahivina fa talohan’ny fanonganam-panjakana no nisian’ny filaharana tsara indrindra azon’i Madagasikara satria faha-85 ny firenena Malagasy tamin’izany. Etsy an-daniny, mbola maro hatrany ny doro tanety eto amin’ny firenena ary tombanana eo amin’ny 450 tapitrisa dolara no fatiantoka aterany. Tsy ny ala sy ny tany ihany no lasibatra amin’ny afo fa mamotika ny tsiron-tany ary manimba hatrany amin’ny tanimbary sy ny tontolo iainana mihitsy. Ankoatra izay, maika ery ireo mpanondrana an-tsokosoko mandefa ny hazo lafo vidy any amin’ny firenen-kafa ary tsy mijery ny hoavin’ny taranaka mihitsy. Araka ny tatitra dia mitentina 1 tapitrisa dolara na 3 304 410 000 Ar (1dolara=3304,01) ny vidin’ny fandriana iray vita amin’ny andramenan’i Madagasikara any Sina ary 60 isan-jaton’ny andramena tonga any dia avy aty amin’ny kaontinanta Afrikanina avokoa. Ny 9 monja tamin’ny 203 voarohirohy tamin’ny andramenan’i Madagasikara anefa no mba nigadra ary ny tena lohandohan’ny mpisorona izay mpanao politika ambony ny ankabeazany dia lasa nanankarena be sy mbola miriaria ary milatsaka hofidina mihitsy aza, hoy hatrany ny AVG.

Tsirinasolo

Tia Tanindrazana

Samia mijoro ho an'i Gasikara.