Dossier

Jirama sy Jovena Hitsahatra ny fiaraha-miasa

Dossier
Zoma 04 Oktobra 2019

Ny faran'ny volana septambra teo no nandefa taratasy fangatahana fampitsaharana ny fifanaraham-piaraha-miasan’ny JIRAMA amin'ny orinasa JOVENA ny fitondram-panjakana Malagasy sy ny filankevi-pitantanana.

Fifanarahana izay mahakasika ny fividianan'ny JIRAMA herinaratra amin'ny JOVENA izany. Mba ahafahan'ny orinasa JIRAMA mandoa ny trosany ara-potoana no antony tsy maintsy nirosoana tamin'izao dingana izao. Tsiahivina fa mitotaly 1 200 miliara ariary ny trosa tsy voaloany amin'ireo mpiara-miombon'antoka aminy. Mety ho nahita orinasa ahafahana mividy moramora kokoa eo amin'ny fanjifana solika ataony ihany koa ny JIRAMA. Ny 21oktobra 2015, no nanombohan'ny fiaraha-miasa teo amin’ny roa tonta ary izao mbola mitotongana hatrany izao ny orinasa. Naverimberin’ny tompon’andraikitra hatrany fa fositra mahatonga fatiantoka hatrany ny fividianana solika sy ny fanofana ireo milina ary ny fividianana herinaratra amin'ireo mpiara-miombon'antoka aminy. Fepetra noraisina sy efa nambara ny hanavaozana ireo fifanarahana amin'ireo mpiara-miombon'antoka rehetra izay mbola an-dalana amin'izao. Andrasana ny ho tohin’ny raharaha, indrindra ny hamalian’ny orinasa JOVENA mahakasika io taratasy fangatahana fampitsaharana ny fifanarahana io.

Tsirinasolo