Dossier

Hery ara-toekarena Nosongonan’i Inde i Frantsa

Dossier
Alakamisy 19 Jolay 2018

Nihemotra faha fito i Frantsa ary lasa laharana fahenina i Inde araka ny tatitry ny Banky iraisam-pirenena tamin’ny 11 jolay farany teo.

Efa nihoaran’izy ireo ny harinkarena faoben’ny frantsay tamin’ny taona 2017: 2597 miliara dolara ny an’ny karana raha toa ka 2582 miliara dolara ny an’i Frantsa. Nihazakazaka be tahaka ny an’i Sina ny fitombon’ny harinkaren’izy ireo satria tao anatin’ny 10 taona dia lasa avo roa heny izany. Efa mahatratra 7% mahery izany tamin’ity taona 2018 ity ary eritreretina hanafosafo ny 8% izany amin’ny taona 2019. Ny fandrosoan’ny sehatra fanabeazana, ny fahasalamana, ary ny fifandraisan-davitra no tena nampiainga tanteraka ny toekareny. Ankoatra izay dia nandroso be koa ny fampidiran-ketra noho ireo orinasa maro misehatra amin’ny fanarahan-dalàna araka ny tatitry ny tahirim-bola iraisam-pirenena. Nanambara mihitsy aza moa ny kabinetra mpanao fanadihadiana iray any Londres fa raha voatazon’i Inde izao hafainganam-pandehany ara-toekarena izao dia hosongonany indray i Royaume-Uni amin’ny fiafaran’ny taona 2018 ary mety ho laharana fahatelo ihany koa izy amin’ny taona 2032. Etsy an-daniny dia nanatsara tanteraka ny toekaren’i Lafrantsa ny nahazoany ny amboara maneran-tany tamin’ny fifaninanana baolina kitra iny. Nitombo be mantsy taorian’iny ny sehatra fizahantany sy ny famokarana anatiny mifandraika amin’iny fifaninanana iny. Andrasana ny tarehimarika sy ny akon’izany amin’ny laharany manerantany izay nihoaran’i Inde ity. Anatin’ny fifaninanana amin’ny fampandrosoana tanteraka ny firenena matanjaka fa i Madagasikara ihany koa mihazakazaka mamonjy mankany amin’ny farany hatrany.

Tsiry