Dossier

Fitantanam-bola Nahavita ezaka betsaka ny governemanta Malagasy

Dossier
Sabotsy 08 Septambra 2018

Nivoitra io nandritra ny fitsidihana ara-pomba fifanajana ny praiminisitra, Ntsay Christian, nataon’ny solontena vaovaon’ny Tahirimbola Iraisam-pirenena (FMI) eto Madagasikara,

Marc Gérard. “Nahavita ezaka betsaka ny governemanta Malagasy”, hoy ity solontenan’ny FMI ity, “na teo amin’ny fitantanam-bola na teo amin’ny fandrindrana ny lafiny toekarena ankapobeny, indrindra tamin’ny namerenana ny fitombon’ny harinkarena izay nitohy hatrany”. Nambarany fa hifantoka manokana amin’ny olana mahakasika ny vidin-tsolika, ny fitantanana ny raharaham-panjakana, ny Jirama ary ny ady amin’ny kolikoly, ireo asa hotanterahin’ny iraky ny FMI ho avy manaraka, ary hatao vaindohan-draharaha eo amin’ny fiaraha-miasa izany. Marihina fa ny 21 aogositra lasa teo no tonga nitsidika ny minisitry ny fitantanam-bola sy ny tetibola, Andriambololona Vonintsalama Sehenosoa, ity solontena maharitra vaovao ny FMI eto Madagasikara ity ary nifantoka tamin’ny fanomanana ny fanavaozana faha-4 amin’ny fandaharan’asa FEC (Facilité Élargie de Crédit) amin’ny famoahana vola izay kasaina amin’ny tapaky ny volana septambra ho avy izao.

Marigny A.