Dossier

Fitadiavana asa eto Madagasikara Sakana ny tsy fahaizana mifehy ny teny vahiny

Dossier
Zoma 17 Aogositra 2018

Nisokatra tamin’ny fomba ofisialy tetsy amin’ny hotely Carlton Anosy omaly alakamisy ilay hetsika mandritra ny roa andro “3 in one Event” izay karakarain’ny AS’Sidus.

Hetsika natao hihaonan’ireo sekoly ambony sy ny orinasa “call center” eto an-drenivohitra izy io hanoroana lalana ireo mpianatra ao amin’ny taona famaranana. Misy ihany koa ny fandraisana mpiasa ho an’ireo izay mitady asa ka eo no ho eo no hijerena ny CV sy hanaovana sahady ny dinidinika am-bava (entretien) raha ny tati-dRanarivelo Mamisoa, tompon’andraikitry ny serasera eo anivon’ny AS’Sidus. Tolotr’asa manodidina ny 200 isaky ny orinasa iray no homena ny tanora ary misy ihany koa ireo oniversite telo afaka handefa ireo tanora mitady vatsim-pianarana any ivelany. Olana ny tsy fahaizan’ny tanora Malagasy ny teny vahiny, indrindra ny teny frantsay. Saika mitaky fahaizana miteny vahiny hatrany mantsy ireny orinasa “call center” ireny. Misy ihany koa moa ireo orinasa hafa tahaka ny CNaPS, Orange, Open flex izay niezaka ny nandray ireo CV an’ny tanora Malagasy maro be tsy an’asa. Andiany voalohany moa ity hetsika tsy andoavam-bola ity ary tanora hatrany amin’ny 3.000 isa no andrasana hitsidika hatramin’ny anio.

Tsirinasolo