Dossier

Fiarovana ny Indostria Malagasy Miara-miasa ny DGI sy ny ANMCC

Dossier
Sabotsy 14 Jolay 2018

Omaly zoma 13 Jolay no natao tetsy amin’ny ministeran’ny fitantanam-bola sy ny teti-bola Antaninarenina ny fifanaovan-tsonia fiarahamiasa amin’ny fitantanana ankapoben’ny hetra sy ny rafitra mpanao fanadihadiana amin’ny lalàna momban’ny fifaninanana (ANMCC).

Iaraha-mahalala fa mamono hatrany ny orinasa anatiny ny fandikan-dalàna amin’ny fifaninanana ka mampihena ny tombom-barotra miditra aminy. Misy fiantraikany amin’ny fidiram-bola amin’ny kitapom-bolam-panjakana izany ary manaratsy ny toekarena. manoloana izany indrindra dia natsangana ny ANMCC hanao ny fanadihadiana sy ny fanangonam-baovao momba ny fandraharahana manodidina ny vokatra anankiray. Etsy an-kilany, ny DGI dia anisan’ny sampandraharaha iray afaka manome vaovao ka izay no antony anaovana fiaraha-miasa aminy hoy ny tale jeneralin’ny ANMCC, Andriamatoa Barthelemy. Mifamatotra ihany koa anefa satria fifanakalozam-baovao amin’ireo fitarainana azo avy any amin’ny mpandraharaha no ifampizarana mialoha ny fanadihadiana sy ny rindrandamina ary ny fepetra horaisina. Marihina fa ankoatr’ireo orinasa Malagasy 5 efa nahatonga fitarainana teo anivon’ny ANMCC dia ny fanafarana vovon-tsavony no fanadihadiana nosokafana voalohany tamin’ny fomba ofisialy mba hiarovana ny mpamokatra eto Madagasikara. 9 volana hatramin’ny herin-taona ny fotoana hanaovana fanadihadiana ary voafaritra ao anatin’ny lalàna mifehy ny fifaninanana sy ny didim-panjakana ny fahefan’ny ANMCC manatanteraka izany. Araka izany dia samy mahazo tombony amin’ity fiaraha-miasa ity avokoa na ny ANMCC mpiaro ny Indostria amin’ny famokarana, na ny DGI amin’ny lafiny fakana ny hetra.

Tsiry