Dossier

Partagé sur :
• facebook

Mampiroborobo ny toekarena ny fahasalaman’ny tontolon’ny fandraharahana anatin’ny firenena iray.

 Eto Madagasikara dia tena mbola marefo izany, indrindra ny amin’ny fanatanterahana ny fandraharahana ataon’ny tsy miankina. Tokony hisy aloha drafitra maty paika hanamorana ny fikarakarana ny taratasy ara-panjakana izay mampikaikaika ny mpandraharaha tsy miankina. Tsy azo ihodivirana koa ny fifanatonana sy ny fiaraha-miasan’ny fanjakana sy ny tsy miankina. Rehefa marin-toerana sy mangarahara tsara izany dia afaka mampiasa vola sy manodim-bola araka izay tratrany ny mpandraharaha. Rehefa mandeha mantsy ny fandraharahana ka tsy miferotr’aina ireo mpisehatra amin’izany dia hanainga haingana be ny toekarena. Rehefa milamina ny tontolon’ny fandraharahana noho ireo ezaka atao dia tsy olana intsony ny fifaninanana eo amin’ny samy mpandraharaha hatramin’ny orinasa madinika sy salantsalany. Amin’ny fanamorana ireo antontan-taratasy ireo dia tsy maintsy jerena hatrany ny fandrosoan’ny teknolojia mifandraika ary ilaina ny fampiharana azy eto amin’ny firenena. Tsy tokony ho hita taratra mihitsy ny toe-javatra mety hahakivy ny mpandraharaha, indrindra ny amin’ireny dingana ara-taratasy tsy maintsy iantsorohany ireny.  Ilaina ny fandraisan’andraikitry ny fanjakana ny amin’ny taona ho avy eo mba hisy tohana mafy mihitsy amin’ny filankevitry ny fampandrosoana ara-toekarena (EDBM) hijerena ireo drafitra sy fitsipika ary lalàna araka ny tokony ho izy hanatsarana ny tontolon’ny fandraharahana mba ho tombony ara-toekarena.

Tsirinasolo

Tia Tanindrazana

Samia mijoro ho an'i Gasikara.