Dossier

Fampiroboroboana ny fizahantany Ilaina ny fanarahana ny fenitra iraisam-pirenena

Dossier
Zoma 31 Aogositra 2018

Nisy omaly ny fifanaovan-tsonia fiaraha-miasa sy ny famaranana ny atrikasa nataon’ny minisiteran’ny fampianarana teknika sy ny fanofanana arak’asa ary ny fikambanana CS2PCTHR.

Hampandroso ny sehatra fizahantany ary hanatsara ny tontolon’ny asa ny fanofanana natao mba ho tojo izay tena takian’ny tsenan’ny asa ireo olona nisitraka izany. Nanambara ihany koa ny minisitra Rahantasoa Lydia Aimée fa fanatanterahana ny politika nasionalin’ny fananana asa sy fanatsarana ny kalitaon’ny mpiasa efa misehatra amin’izany no tanjona. Nofidina manokana ny ivontoerana fanofanana any Foulpointe mba ho filamatra ary efa tena manaraka ny fenitra iraisam-pirenena. Hitondra vokatra be ny amin’ny fampiroboroboana ny sehatra fizahantany izany satria tsy misalasala ny vahiny rehefa hitany manara-penitra ny toerana hivanianany, indrindra ny fandraisan’ny mpiasa azy. Ny fikambanana iraisam-pirenena momba ny fanabeazana sy ny siansa ary ny kolontsaina UNESCO no mpiara-miombon’antoka tamin’ity fiaraha-miasa ity. Tanjona, hoy ny solontenan’ ny UNESCO ny hanamorana ho an’ny mpampiasa sy ny mpiasa ny amin’ny filan’ny asa, indrindra ny fametrahana izay fenitra iraisam-pirenena izay mba ho tombony ara-toekarena.

Tsirinasolo