Dossier

Fako eny amin’ny Hopitaly Azo ahodina ihany koa

Dossier
Talata 04 Septambra 2018

I Madagasikara dia anisan’ny nandray anjara tamin’ny fifanarahana tany Stockholm niompana tamin’ny fiarovana ny fahasalamana sy ny tontolo iainana miainga amin’ny fampihenana ny fampiasana ny mercure.

Nisitraka ilay tetikasa fampidinana ireo etona manimba ny tontolo iainana sy ny mercure manimba ny fahasalamana isika. Ho fanatanterahana izany dia nisy ireo fitaovana marobe mitentina 325 000 dolara na 1 089 042 500 Ar nomen’ny tetikasan’ny Firenena Mikambana ho amin’ny fampandrosoana (PNUD) sy ny fanampiana ho amin’ny tontolo iainana maneran-tany (FEM) tetsy amin’ny HJRA Anosy omaly. Ny ankabeazan’ireo fitaovana ireo dia ireny fanariana fako ireny ary navahana mihitsy ireo karazam-pako ariana ao satria misy ny anariana ny sakafo, ny taratasy ary ny plastika. Rehefa izay dia lanjaina aloha ireo fako avy eo dia ahodina amin’ilay fitaovana lehibe fanodinana (autoclave) mahazaka hatrany amin’ny fako 50 kilao. Ankoatr’izay dia nisy ny fitaovana ara-pahasalamana tsy misy mercure nozaraina ka tonga nitsidika ny hetsika ny minisitry ny tontolo iainana sy ny ala Randriatefiarison Guillaume sy ny minisitry ny fahasalamam-bahoaka Rantomalala Yoël Harinirina.

Tsirinasolo