Dossier

Ady amin’ny famotsiam-bola Lasa sakana ho an’ny SAMIFIN ny lalàna sasany

Dossier
Sabotsy 21 Jolay 2018

Ny lalàna lah2004-020 tamin’ny 19 aogositra 2004 izay mifehy ny SAMIFIN hatramin’izao dia manasokajy fotsiny hoe avy amin’iza avy no raisina ny fanambaran’ahiahy.

Lalàna izay efa tamin’ny 14 taona lasa sady tsy manaraka ny toetrandro intsony. Efa nandroso hevitra sy niantso ny tompon’andraikitra hatrany ny SAMIFIN mba handany lalàna ahafahana miady amin’ny famotsiam-bola amin’ny fomba mahomby araka ny tatitry ny Tale Jeneraliny Andriamatoa Lamina Boto Tsara Dia. Tamin’ny taona 2016 no efa nandrafitra volavolan-dalàna vaovao izy ireo ary nalefa tany amin’ny fanjakana ny taona 2017 kanefa hatramin’izao dia mihitsoka fotsiny eny amin’ny antenimieram-pirenena ary tsy fantatra mazava ny tohiny. Rehefa te hahita fahombiazana amina trangan-javatra tahaka ny famotsiam-bola, fakàna an-keriny itadiavam-bola ary ny kolikoly anefa dia tokony hanana lalàna tsara manaraka ny toetrandro ahafahana miasa. Voafetra ihany ny andraikitry ny SAMIFIN raha mbola io lalàna io no iasana sy entina mihetsika ka tokony handray anjara ny fahefana mpanao lalàna.

Tsiry