Dossier

Ady amin`ny fahantrana Miainga amin`ny foto-pisainana

Dossier
Alarobia 30 Oktobra 2019

Zavatra roa no mamaritra ny fahantrana. Voalohany dia miainga avy amin`ny foto-pisainana. Betsaka ny ezaka ataon`ny fitondrana toy ny lalana, tsena, fotodrafitrasa maro samihafa…

Ny ampitso anefa dia lasa tsena, na koa hanaovan`ny olona fanariam-pako, ny fiantsonana ho an`ireo fitateram-bahoaka dia lasa parking. Manampatra ny tsy fanajana ny lalàna amin`ireny zavatra ireny. Eo ihany koa ny fangalarana ireo andrin-jiro, ny fanaovana maloto eny an-dalambe. N`inona inona ny fotodrafitrasa atao hitondra fandrosoana sy fivoarana dia tsy hisy zavatra miova satria ny foto-pisainana no mitondra azy. Manomboka any amin`ny fanabeazana eo anivon`ny fianakaviana, fiarahamonina ary eny an-tsekoly. Faharoa, ny fandrosoana sy ny fivoarana dia tokony hiainga eo amin`ny fanjakana. Manome asa ny fanjakana, manome fiainana sahaza ho an`ny vahoaka na any an-tanàn-dehibe na any amin`ireny toerana lavitra maro samihafa ireny. Mampihena ny vidim-piainana, ny tsy fandriampahalemana, … Ireo koa no mahatonga ny olona mitsoaka ho aty an-tanàn-dehibe satria very fananana dia miha mahantra. Mila mametraka ny politika ekonomika sy sosialy mazava tsara eto Madagasikara. Izany anefa dia tsy maintsy miainga amin`ny fampianarana sy famoronana asa ary ny fampidirana ny hetra samihafa.

Marigny A.