Any Ivelany

Tsy fisian’ny tongolo any Bangladesh Nandray andraikitra avy hatrany ny fanjakana

Any Ivelany
Zoma 22 Novambra 2019

Ny orana be nahazo an’i India ka niantraika tamin’ny famokarany no nahatonga azy tsy hanondrana tongolo intsony.

Voakasika tamin’izany ireo firenena fanondranany ary tsy vitsy no nahitana fisondrotam-bidy. Anisan’ireny i Bangladesh izay mpanjifa ny 2/3-n’ny famokarana tongolo any India noho ny sakafon’izy ireo tena miankina amin’izany ny ankamaroany. Tsy nipetra-potsiny kosa anefa ny fitondram-panjakana tany fa nitady mpanondrana vaovao ka anisan’izany ny tany Birmania sy Egipta. Misy ihany koa ireo tongolo namidy mora ho an’ireo mponina ambany fahefa-mividy ka ny fanjakana no tompon’antoka. Tsara alain-tahaka ny fandraisan’andraikitra sahala amin’itony eto amin’ny firenena. Raha ny vary tokoa mantsy no foto-tsakafon’ny Malagasy dia manototra tanimbary indray no ataon’ny fitondrana. Tsy maintsy hanafatra vary hatrany ny firenena Malagasy ary vahaolana tsy mipaka amin’ny rehetra ny tsena mora sy ny vary mora.

Tsirinasolo