Any Ivelany

Partagé sur :
• facebook

Mbola tsy afaka mivelatra tsara ary ezahina takonana mihitsy ny ezaka hataon’ny sendikan’ny polisy ho fiarovana ny zon’ireo mpiasa ao aminy amin’izao. Raha araka ny fanazavan’Atoa Randriamihamina Alphonse,

sekretera jeneralin’ny Syndicat éveil fédéral de la police nationale Malagasy na ny SEFPONAM tamin’ny mpanao gazety tamin’ny sabotsy teo mantsy dia mbola foana ny fanelingelenana hataon’ny tompon’andraikitra rehefa misy fitakiana hatao hany ka toa lasa tsy misy dikany amin’ny mpiasa ny asan’ny sendika, izay karazany takonana mihitsy mba tsy hahafahan’ny mpiasa mirona sy manome lanja izany. Mbola misy ihany koa hoy izy ny antsojay na ankolaka na mivantana mahazo ny mpiasa tsy hiditra anaty sendika ankoatra ny mbola tsy nandraisan’ny Ministra tompon’andraikitra ity sendika ity hatreto. Raha araka ny fanazavany hatrany anefa dia andraikitry ny sendika miaro ny tombontsoa iombonan’ny mpiasa na dia anisan’ny asan’ny polisim-pirenena aza ny miaro ny andrim-panjakana. Mankalaza ny faharoa taona niorenany ny SEFPONAM ka tamin’ny Sabotsy teo no nanokafana izany. Tamin’ny taona 2018 nandritra ilay tolona nataon’ny solombavambahoaka 73 izay nahafatesana olona teny amin’ny kianjan’ny fahaleovantena no nijoroany voalohany. Tsy nanaiky ny famonoan’olona sy ny fanaovana ny vahoaka ho fahavalo mantsy ity sendika ity. Amin’izy ireo dia tokony ho mpiaro ny vahoaka ny mpitandro ny filaminana fa tsy natao ho fitaovana politika hamonoana ny mpiray tanindrazana.

 Pati

Tia Tanindrazana

Samia mijoro ho an'i Gasikara.