Any Ivelany

Sempotry ny “Gilets Jaunes” i Frantsa Miha mafy ny gidragidra, 263 no naratra

Any Ivelany
Alatsinainy 03 Desambra 2018

Nitarika fivoriana maika tao amin’ny lapan’i Elysée noho ny hetsika miha mahery vaika ataon’ny “Gilets jaunes” ny filoha Frantsay Emmanuel Macron omaly alahady 2 desambra antoandro.

Niaraka taminy tao ny praiminisitra, ny minisitry ny atitany sy ny sekreteram-panjakana miandraikitra ny filaminana. Nilaza ny filohan’ny antenimierandoholona Gérard Larcher fa tsy azo eritreretina intsony ny hisiana sabotsy gidragidra fahatelo. Nijery ifotony ny zava-misy teny amin’ny Arc de Triomphe sy ny Place de l’etoile izay tena nitrangan’ny fanapotehana ihany koa i Emmanuel Macron. Tetsy an-kilan’izay dia nangataka fihaonana niarahana tamin’ny minisitry ny atitany sy ireo tompon’andraikitra avy amin’ny boriborintany maro ao Paris renivohitra izay tena nisehoan’ny korontana ihany koa ny ben’ny tanàna Anne Hidalgo. Henjana ny fifandonana ny sabotsy teo. Nanaparitaka ny mpanao fihetsiketsehana amin’ny alalan’ny rano sy ny baomba mandatsa-dranomaso ny mpitandro ny filaminana. Ireo mpitokona kosa sady mitoraka amin’ny karazan-javatra maro no mametraka barazy sy mandoro izay azo dorana rehetra. Nahatratra 263 ireo naratra ka mpitandro ny filaminana ny 23. Olona 412 no nosamborina ary 387 no notanana teny amin’ny biraon’ny polisy. Andrasana rahampitso talata ny fanazavan’ny minisiteran’ny atitany sy ny filaminana ny amin’ny fepetra napetrak’izy ireo mba hisorohana sy hifehezana ny fihetsiketsehana satria tena goavana ny fahapotehana. Nisy ny fiara, trano fonenana, toeram-pivarotana may kila, simba ny fotodrafitrasa maro. Tahaka ireny tany miady ireny mihitsy ny tao Paris ny sabotsy lasa teo. Tsy fanekena ny fampiakarana ny vidin-tsolika sy fitarainana noho ny fidangan’ny vidim-piainana no anton’ny hetsik’ireo “gilets jaunes” manerana an’i Frantsa ary efa nivoaka mihitsy aza ny fehezanteny hoe : miala i Emmanuel Macron rehefa tsy mahavaha olana. Nangataka ny praiminisitra mba hihaona amin’ireo lehiben’antoko moa, araka ny vaovao farany ny filoha Macron.

RTT