Any Ivelany

Partagé sur :
• facebook

Mbola hiangarana i Madagasikara raha samy firenena. Nahita faisana i Zimbabwe sy Mozambika taorian` ny fandalovan` ny rivo-doza IDAI farany teo. Raha ny tatitra farany, miisa 259 no namoy ny ainy ary 257 no tsy hita popoka Zimbabwe.

Ho an` i Mozambika, 400 mahery no namoy ny ainy ary an-jatony maro no mbola karohina. Ho an`i Mozambika manokana, an-tapitrisa no traboina, 90%n` ny fahasimbana, 600 000 no traboina… Mila sakafo sy rano ny ao an-toerana ka tsy ampy ny fanampiana avy amin`ny firenena mikambana (ONU) sy ny efa misy any an-toerana. Miantso vonjy amin`ny iraisam-pirenena ny firenena mikambana manoloana ny voina nahazo an` i Mozambika ka nanao antso avo ny seketera jeneralin` ny ny firenena mikambana, Antonio Guterres amin`ny hampitomboana ny fanampiana izay omena ireo traboina ao Afrika afovoany: Malawi, Zimbabwe, Mozambika… Ny firenena mikambana rahateo efa namoaka vola mitentina 20 tapitrisa dolara saingy mbola tsy ampy. Raha tsy voavaly haingana dia ahiana hisy fihetsiketsehan’ireo olona sahirana sy traboina any Mozambika. Manampy trotraka izany ny vidin` ny entana toy ny sakafo izay miaka-bidy noho ny fanararaotana. Ankoatra olana eo amin’ny fiahiana ny maha olona, fotodrafitrasa maro no dibo-drano tanteraka. Sarotra no hanarina ny firenena hoy ireo mpandinika ny toekarena raha miresaka an’i Mozambika. Tsy tafiditra ao anatin` ny tetibolam-panjakana sady tsy nampoizina ihany koa fa ho goavana ny fahasimbanana nateraky ny rivo-doza IDAHI. Tsy maintsy ny fanampiana avy amin` ny Firenena Mikambana no hahafahana manohitra ny krizy mety ho avy. Olana mipetraka ny fisian` ny kolikoly ao an-toerana ka mampihemotra ny firenena sasany. Raha ny vinavina dia tafiakatra ho 2 tapitrisa ireo tsy manan-kialofana ao Mozambika.

Marigny A.

Tia Tanindrazana

Samia mijoro ho an'i Gasikara.