Any Ivelany

MPAMORONA LAMAODY FANTA-DAZA NODIMANDRY OMALY I PIERRE CARDIN

Any Ivelany
Alarobia 30 Desambra 2020

Nodimandry omaly teo amin’ny faha-98 taonany i Pierre Cardin, ilay teratany

Frantsay namorona ny marika fanta-daza eo amin’ny tontolon’ny lamaody sy ny fitafy “Pierre Cardin” nampitondraina ny anarany. “Ny antom-pisiako eo amin’ny fiainana, dia ny lamaody”, hoy ny teny filamatra napetrany, ary tsy nitsaha-nikaroka izy, izay tonga olona mpampiasa vola sy mpandraharaha malaza iraisam-pirenena. Italianina no tena fihaviany, ary tonga tany Frantsa ny 1924 teo amin’ny faha-2 taonany izy. Niasa tao amin’ny Orinasa mpanjaitra Christian Dior. Nihaona tamin’ilay mpilalao sarimihetsika Jean Cocteau, ary nanjaitra ny akanjo tamin’ilay horonan-tsary “La belle et la bête”. Niala tao amin’ny Christian Dior teo amin’ny faha-28 taonany, ary nanomboka nivelatra. Firenena 120 eo no misy orinasa manana ny “licence” amin’ny famokarana ny Pierre Cardin. Ny taona 2011, dia notomban’i Pierre Cardin ho 1 miliara euros ny orinasany, saika hamidiny, saingy 200 tapitrisa no nahasahian’ny banky azy. “Misaotra Cardin tamin’ny nanokafanao varavarana ho ahy teo amin’ny tontolon’ny lamaody, ary nahafahako nanova ny nofy ho tena nisy”, hoy ilay mpanao lamaody malaza Jean-Paul Gaultier. Tao amin’ny Atelier Cardin no nanombohany fiofanana arak’asa, fony izy vao 18 taona.