Any Ivelany

Miketrika ny Amerikanina Handefa olona eny amin’ny volana indray

Any Ivelany
Alakamisy 18 Jolay 2019

50 taona aty aorian’ny tetikasa Apollo 11, izay sambondanitra voalohany tonga teny amin’ny volana dia mieritreritra ny hiakatra eny indray ny Amerikanina.

Artemis no anarana nampisalorana ity tetikasa goavana ity izay tohanan’ny filoha Donald Trump mafy moa, izy rahateo dia nametraka ho fanamby ny fifehezan’ny Amerikanina ny any ambony tsy taka-maso any sy ny famoronana andian-tafika mihitsy aza ho amin’izany. Lehilahy sy vehivavy no alefa eny amin’ny volana amin’ity indray mitoraka ity. Amin’ny taona 2024 no hanomboka ny dia ka dingana voalohany aloha dia sambon-danitra irery tsy misy olombelona no alefa ka andrama amin’izany ny fiara voatokana handeha eny amin’ny volana. Hisy andrana faharoa aorian’io. Hirosoana amin’izay ny dingana fahatelo ka olombelona amin’izay no halefa. Balafomanga faran’ny raitra sy matanjaka indrindra eto ambonin’ny tany dia ny Space Launch System (SLS) no hanatanterahana ireo dia miisa 3 ireo. Mieritreritra ny sampandraharaha Amerikanina misahana ny eny ambony tsy takamaso fa haharitra kokoa ny fijanonana eny amin’ny volana amin’ity indray mitoraka ity fa tsy indray miserana tahaka ny natao tamin’ny 1969. Ao anatin’ny vinan’ny Amerikanina moa ny hahafahan’ny olombelona monina sy miaina mihitsy eny amin’ny volana sy any amina planeta hafa, tahaka ny planeta Mars ohatra izay hatreto aloha no fantatra fa mifanakaiky kokoa amin’ny planeta tany ary tokony ho zakan’ny olombelona tsara ny monina ao aminy, miaraka amina fotodrafitrasa sy fitaovana manokana.

RTT