Any Ivelany

Lasa fahafinaretana ny manely tsaho Tena azo tsapain-tànana ny loza aterany

Any Ivelany
Sabotsy 15 Desambra 2018

Anisan’ny loharanom-baovao faran’izay haingana ireo tambajotran-tserasera toy ny facebook sy ny twitter ary ny instagram sy ny tariny saingy matetika dia faran’izay tsy mari-pototra ihany koa.

Saika io avokoa no nipoiran’ireo tsaho sy honohono ary lainga rehetra ary nahatonga olona maro tany am-ponja mihitsy. Tsy hidirana lalina intsony ny mikasika azy ireny fa ny tiana antitranterina fotsiny dia ny hoe tsy mbola nisy soa hita ho nateraky ny tsaho loatra aloha fa saika nampidi-doza foana izy ireny. Tranga nampivarahontsana vao tsy ela ny nitranga tany amin’iny faritr’i Fenoarivo Atsinanana iny. Tao amin’ilay kaominina antsoina hoe Ambodiazinina, raha ny marimarina kokoa. Tsaho no nahatonga ireo polisy telolahy ho matin’ny fitsaram-bahoaka. Nisy ny firosoan’ny mpitandro ny filaminana tamin’ny fisamborana ireo noheverina fa tompon’andraikitra tamin’io fitsaram-bahoaka io ary efa ho 20 isa mahery ireo voasambotra. Ankehitriny ihany koa dia lasa toy ny haolo ilay tanàna noho ny fahatahoran’ireo mponina mbola hosamborina na dia efa niezaka nidina tany an-toerana nanazava ny sain’izy ireo aza ireo tomponandraiki-panjakana fa tsy misy tokony hatahorany intsony. Sekoly EPP miisa 9 sy CEG miisa 2 no voatery nikatona. Vokatry ny tsaho, honohono, lainga, fita-bitro sy ny tariny daholo anefa izany.

J. Mirija