Any Ivelany

Lanonam-panjakana eny Iavoloha Hiompana amin’ny inona ?

Any Ivelany
Sabotsy 05 Janoary 2019

Raha tsy misy ny fiovana dia amin’ny alatsinainy 7 janoary 2019 ho avy izao no hanatanterahana ny lanonana fifampiarahabana ofisialy noho ny taona vaovao eny amin’ny lapam-panjakana Iavoloha.

Lanonana hiarahabana ny Andrim-panjakana isan-tsokajiny sy isan’ambaratongany ary masoivoho vahiny miasa sy monina eto amintsika ny filoham-panjakana mpisolo toerana, Rivo Rakotovao mivady. Niova tsy toy ny mahazatra ny daty fanatanterahana izany satria tsy zoma toy ny mahazatra eny Iavoloha. Mihazakazaka tokoa ny toe-draharaha mitranga eto Madagasikara satria indray andro mialoha ny famoahana voka-pifidianana ofisialy eny amin’ny Fitsarana avo momba ny lalàmpanorenana (HCC) no hanatanterahana ny fifampiarahabana ofisialy eto amin’ny firenena. Andrasana fatratra ireo kabary hataon’ireo tompon’andraiki-panjakana. Hiompana amin’ny inona ny lahatenin’ny filoham-panjakana sy praiminisitra manoloana izao toe-draharaha mitranga izao ? Andrasana ihany koa izay holaizain’ny filohan’ny Antenimieram-pirenena sy ny Antenimierandoholona. Ny fitoniana no tena ilaina amin’izao vanim-potoana iandrasana voka-pifidianana izao saingy hojerem-potsiny ve ny resaka kolikoly sy tsy fahatomombanana nandritra ny taom-pifidianana 2018 ? Mahakasika ny lanonam-panjakana, manodidina 1 600 no vahiny hasaina tahaka ny hatramin’izay ihany ary tsy dia misy fiovana toy ny tamin’ny taon-dasa ny fandaminana amin’ny ankapobeny.

Marigny A.