Any Ivelany

Johnny Hallyday Ifandroritan’ireo zanany ny fananany

Any Ivelany
Talata 13 Febroary 2018

Niseho masoandro ny fizarazarana eo amin’ny fianakavian’i Johnny Hallyday mahakasika ny didy miafina nataon’ity mpanakanto ity izay nodimandry ny 6 desambra teo momba ny fizarana ny fananany.

Tsy manaiky ity didy miafina ity moa ny zanaka vavin’ity mpanakanto ity Laura Smet, raha ny nambaran’ny mpisolovavany ny alatsinainy teo. Ity didy miafina ity moa izay milaza fa ny fananan’i Johnny Hallyday sy ireo zo amin’ny maha artista azy rehetra dia an’ilay vadiny farany Laeticia ary raha misy ny fahafatesan’ity vady navelany ity dia ny zanany vavy 2 dia i Jade sy Joy no mandova ary zara mitovy. Ity didy miafina ity moa dia manaraka ny lalàn’ny fanjakan’i kalifornia (Etaazonia) izay mifanohitra tanteraka amin’ny lalàna Frantsay. Teraka noho izany ny disadisa amin’ireto fianakaviana ireto ka hisy ny fampiakarana ny raharaha eny amin’ny fitsarana.

Afrika Atsimo

Akaiky ny farany ho an’ny filoha Zuma

Nivory omaly ireo mpitarika ny antoko ANC ao Afrika atsimo ka lahadinika lehibe tamin’izany ny mety ho fanilihana ny filoha Jacob Zuma; voaresaka any an-toerana ihany koa ny hanatanterahana fifidianana solombavambahoaka mialoha ny fotoana.Malaza ratsy amina raharahana kolikoly i Jacob Zuma ary vesatra tsy latsaky ny 18 no miandry azy eny amin’ny fitsarana.Mahatezitra ny afrikanina tatsimo ihany koa ny filibany miaraka amin’ireo vadiny 4 sy ny zanany efa ho 21; mandany volam-panjakana fotsiny hoy ny olona.Miezaka mafy mifampiraharaha amin’ny ANC ny filoha Zuma mba hahazo ilay zo miaro azy amin’ny fanenjehana ara-pitsarana.Mbola tantara mitohy.

Tiorkia sy Etazonia

Mandalo fotoan-tsarotra ny fifandraisana

Nanambara ny minisitry ny raharaham-bahiny Tiorka Mevlüt Cavusoglu ny alatsinainy teo nandritra ny valandresaka ho an’ny mpanao gazety tany Istanbul mialoha ny hahatongavan’ny sekreteram-panjakana Amerikanina Rex Tillerson any Ankara amin’ity herinandro ity,fa manoloana ireo kiana mahakasika ny fifandraisan’i Tiorka sy Etazonia dia na ho hamafisina ny fifandraisana na ho rava tanteraka. Nanomboka ny volana jolay 2016 no efa nisy ny fihenjanana teo amin’i Ankara sy Washington noho ny fanohanan’ireto farany ireo milisy Kiorda Sirianina izay noheverin’ny Tiorka fa mpampihorohoro ka notafihan’ny tafika Tiorka. Niantso ny tafika amerikanina moa ny filoha Tiorka Recep Tayyip Erdogan ny mba hialany ny tanànan’i Minjeb hialana amin’ny fifandonana mivantana eo amin’ny tafika Amerikanina sy Tiorka izay mpiara-dia ao amin’ny tafiky ny Otan