Any Ivelany

Johnny Halliday Matin’ny homamiadan’ny avokavoka

Any Ivelany
Alakamisy 07 Desambra 2017

Nodimandry ny alin’ny talata hifoha alarobia teo amin’ny faha-74 taonany ilay mpihira Rock Frantsay malaza, Johnny Halliday na Jean-Philippe Léo Smet amin’ny anarany feno.

Homamiadan’ny avokavoka no nahafaty azy. Efa narary fotoana maharitra i Johnny ary matetika no voatery niditra hopitaly. Frantsay metisy Belza ny tenany. Izy no sokajiana ho mpihira Frantsay goavana indrindra ary nahavita seho sy fampisehoana goavana indrindra ihany koa. I Jhonny no artista nisantatra voalohany ny Stade de France tamin’ilay fampisehoana goavana « Allumez le feu ». Very olomanga, very olo-malaza i Frantsa ary samy naneho ny alahelony ny Frantsay, hatramin’ny filoha Emmanuel Macron. Namoaka rakikira 50 noketrehana tanaty Studio i Johnny Halliday, niampy rakikira mirakitra ny fampisehoana an-tsehatra miisa 29 ary namoaka horonantsary (clip) 150. Nahalafo rakikira manodidina ny 100 tapitrisa manerantany ity andrarezin’ny mozika Rock Frantsay ity. Roapolo taona no niarahany tamin’ny vadiny voalohany dia i Sylvie Vartan. Niteraka iray izy roa (David Halliday). Ny taona 1996 kosa izy no nanambady an’i Laeticia Boudou ary fantatra fa niaina tao anatin’ny fitiavana tokoa izy roa ary nisafidy ny nanangan-jaza mirahavavy avy any Vietnam. Hira tsy afaka am-bavan’ny maro amina firenena maro manerantany, indrindra ny firenena Frankofona tahaka an’i Madagasikara i : L’idole des jeunes, que je t’aime, souvenir souvenir, Retiens la nuit, Laura, Chanteur Abandonné, Le pénitencier, Je te Promets …Ampahany kely amin’ireo hira 1000 nokaloin’i Johnny halliday ireo ary tena manamarika ny tantaran’ny mozika Frantsay.

RTT