Any Ivelany

Johnny Clegg Matin’ny homamiadana

Any Ivelany
Alarobia 17 Jolay 2019

Nodimandry teo amin’ny faha-66 taonany noho ny homamiadana nahazo azy ilay mpihira Afrikanina tatsimo fanta-daza Johnny Clegg. Ilay hira natolony manokana ho an’i Nelson Mandela mitondra ny lohateny hoe :

« Asimbonanga » no tena nahafantaran’izao tontolo izao azy. Le Zoulou Blanc no niantsoana azy noho izy fotsy hoditra kanefa tena nitolona ho amin’ny fanajana ny zon’ny mainty hoditra ary nanohitra ny fanavakavaham-bolonkoditra tany Afrika atsimo. Tsy nahazo nandeha tany Afrika atsimo tamin’ny fiandohan’ny taona 80 ny hirany saingy kosa efa niparitaka tany Eoropa sy Amerika ary tena nankafizin’ny olona. Ny taona 1987 moa izy no nanoratra an’i « Asimbonanga » izay hira natolony manokana ho an’i Nelson Mandela ary nitaky ny fivoahan’ity farany ny fonja. Teraka tany Angletera i Johnny Clegg ary teo amin’ny faha-6 taonany no tonga voalohany tany Afrika atsimo. Niverina tany indray fony izy zatovo ary nahita ny tena zava-nisy marina, nifanerasera tamin’ireo Afrikanina tatsimo avy ao amin’ny foko Zoulou izy, lasa nifandray tamin’izy ireo ka nianatra ny fombany, ny fiteniny ary ny dihy nentin-drazany. Nianatra manokana ny fomba fitendry gitara Zoulou ihany koa izy ary nianatra manokana ny momba ny foko Zoulou teny amin’ny oniversite. Ny taona 2018 no nilaza voalohany i Johnny Clegg fa voan’ny homamiadana. Nambarany tamin’izany fa mahalala tsara ny fianakaviako, hoy izy fa efa akaiky ny farany. Herintaona latsaka kely taty aoriana izy dia izao nodimandry izao.

RTT