Any Ivelany

Partagé sur :
• facebook

Mikorontana tanteraka ao Lafrantsa amin`izao fotoana izao manoloana ny hetsiky ny “Gilets Jaunes”.

 Teraka fotsiny ity hetsika ity manoloana ny zava-misy miantraika amin`ny olo-pirenena tsotra fa tsy avy amina fikambanana na antoko politika na avy amina sendikà. Ny fihetsiketsehana nitranga tao Parisy ny sabotsy lasa teo dia hitarafana ny hatezeran`ny ankamaroan`ny frantsay na dia nisy nihoa-pefy aza. Nahitana akony ihany koa ity hetsika “Gilets Jaunes”ity atsy La Reunion andro vitsivitsy izay ka nahitana barazy maro ary mihamafy izany satria tonga hatrany amin`ny fadin-tseranana. Ny kaompania Air Austral dia efa namoaka fanambarana mahakasika izany. Mandalo fotoan-tsarotra ratsy indrindra hatramin'ny taona 1990 no ho mankaty ny mponina ao an-toerana. Ny hetsi-panoherana nateraky ny fihetsiketsehana teraka tany Frantsa dia toy ny fitrandrahana hamelezana ny tsy fahampiana ara-tsosialy ao amin'ity departemanta ampitan-dranomasina ity. Marihana fa 40%-n'ny mponina ao La Réunion no sokajiana  ho sahirana ary mihoatra ny antsasaky ny 25 taona no tsy an'asa. Tsiahivina hatrany fa mahatsiaro sempotra vokatry ny fampiakarana  hetra nalaina amin`ny solika ireo olom-pirenena frantsay ary nampiseho an`izay fahasahiranana tamin`ny fidiana an-dalambe. Ny filoham-pirenena Emmanuel Macron, nandritra ny fitetezam-paritra nataony tany Lafrantsa dia efa niteny fa azony tanteraka ny ahiahin’ny olo-pirenena saingy tsy nametraka mazava ny fepetra horaisiny manoloana izay. Niandry mafy ny fepetra horaisin`ny governemanta entina hamahana ity olana goavana ity ny ankamaroan`ny frantsay. Miandry fatratra ny fanambarana izay ataon`ny filoham-pirenena frantsay manoloana ny olan`ny vahoaka. Raha tsy misy fiovana, hiresaka amin`ny fahitalavitra anio Atoa Emmanuel Macron ka raha tsy mahavita mamaha ity olana ity dia ahiana hivadika ho revolosionina na fitakiana fanovana tanteraka ny hetsika.

Marigny A.

Tia Tanindrazana

Samia mijoro ho an'i Gasikara.