Any Ivelany

Firenena eoropeanina Efa miditra amin’ny fahasahiranana ara-toekarena

Any Ivelany
Alatsinainy 07 Janoary 2019

Miadam-pamindra tanteraka ny toekarena ao amin’ny firenena eoropeanina, indrindra ireo mikambana ao amin’ilay atao hoe zone euro amin’izao fotoana izao.

Raha notombanan’ny banky foibe eoropeanina (BCE) ho 2% tokoa mantsy ny fitomboana ara-toekarena tamin’ny 3 volana faran’ny taona 2018, dia 1, 6 % ihany no tratra. Betsaka ny antony nahatonga izany ka anisany ny fialan’ny Anglisy tao amin’ny faritra euro. Raha amin’ny volana martsa 2019 tokoa mantsy ny daty voatondro fisarahana tanteraka amin’ny roa tonta dia hatramin’zao tsy mbola nahita marimaritra iraisana foana ny ao amin’ny zone euro sy ny anglisy ny amin’ireo fifanarahana maro satria samy miziriziry ny amin’ireo tombontsoa tadiavina. Anisan’ny tena mampikatso ny fifampiraharahana ao izao ny fangatahan’i Espana ny fiverenan’ny sisintaniny Gibraltar izay lasan’ny Anglisy. Tahaka izany ihany koa ny disadisa amin’ny sisintany 2 ao amin’ny Irlandy Atsimo sy Avaratra. Ankoatra izay dia nisy akony ratsy tamin’ny toekarena eoropeanina ihany koa ny krizy politika tany Frantsa tamin’ireny hetsiky ny Gilets Jaunes ireny. Teo ihany koa ny fiovan’ny governemanta tany Italia izay manao fanahy iniana mampihatra politika ekonomika tsy mifanaraka amin’ny tari-dalana apetraky ny vondrona eoropeanina. Tamin’izany aza moa dia nanarina mafy i Italia hiverina hanaraka ny toromarika saingy tsy nanaiky hatramin’ny farany ary ahiana koa ny mety hialany ao amin’ny zone euro raha izao fihetsiny izao no jerena. Tsy azo odian-tsy hita ihany koa ny ady ara-barotra nisy tamin’ny Amerika sy Sina izay tena nisy fiantraikany ratsy tamin’ny toekarena eoropeanina. Manginy fotsiny ny tsy fahamarinan-toeran’ny rafitra ara-bola sy ny fisondrotam-bidim-piainana, indrindra ao amin’ireo firenena mpikambana ao amin’ny zone euro ireo. Izany rehetra izany no miteraka fahasahiranana ara-toekarena ary ampoizina ny fiantraikany eto Madagasikara.

Tsirinasolo