Any Ivelany

Filoham-pirenena Peroviana teo aloha Voasambotra tany Etazonia noho ny resaka kolikoly

Any Ivelany
Alakamisy 18 Jolay 2019

Voasambotry ny mpitandro filaminana Amerikanina tao Etazonia ny talata lasa teo ny filoham-pirenena perovianina teo aloha, Alejandro Toledo,

noho ny raharaha kolikoly izay nanenjehana azy an-taonany maro. Voapanga ho nanodinkodim-bola mitentina 20 tapitrisa dolara ity filoha teo aloha ity avy amin`ny orinasa brezilianina iray mpanao asa vaventy. Tamin`ny taon-dasa no nametraka taratasy fisamborana ny fanjakana peroviana momba ity raharaha kolikoly ity tamin`ireo manampahefana amerikanina ka izao nahasamborana azy izao. Etsy an-kilany, nandà mafy ny fiampangana azy ity filoham-pirenena teo aloha ity rehefa nanaovana fanadihadiana. Etsy an-daniny, nilaza ny tompon’andraikitra eo anivon`ilay orinasa brezilianina fa mbola nanome vola mitentina 30 tapitrisa dolara, tamin`ny taona 2016, kanefa toa tsy hita popoka ihany koa izany. Maloto ny endriky ny fitondrana perovianina ankehitriny satria filoham-pirenena miisa 4 no samy voarohirohy amin`ny resaka kolikoly avokoa.

Marigny A.