Any Ivelany

Fanolanana Heloka tsy azo atao raharaham-pihavanana

Any Ivelany
Zoma 06 Novambra 2020

Namoaka fanambarana ny tahirin’ny Firenena Mikambana ho an’ny ankizy (UNICEF), manoloana an’ireo trangana fanolanana nisesisesy tato ho ato, izay saika ny ankizy tsy ampy taona no niharany.

Niompana indrindra tamin’ny fanentanana ny rehetra handray andraikitra ity fanambarana nataon’ny UNICEF ity, ka hampilaza, na hitory avy hatrany, raha vao mahatsikaritra na miahiahy trangana fanolanana fotsiny. Isan’ny azo antsoina amin’izany ny laharana maitso 147. Azo atao ihany koa ny mampandre ny tompon’andraikitra, ao anatin’ny tranonkala arozaza.mg, na manatona ny polisy misahana ny zaza tsy ampy taona. Ho an’ireo niharan’ny herisetra ara-pananahana kosa dia misokatra ary azo atonina tsara ny CSB sy ireo Centre Vonjy miisa 6 manerana ny Nosy. Nanamarika ihany koa moa ny UNICEF fa heloka ny fanolanana ka tsy azo alamina amin’ny raharaham-pihavanana fa tokony hosaziana amin’ny fehezan-dalàna famaizana mihatra eto Madagasikara.

Marigny A.