Any Ivelany

FANALALAHANA NY FANALAN-JAZA NEKEN’NY LOHOLONA ANY ARGENTINE

Any Ivelany
Alakamisy 31 Desambra 2020

Nankatoavin’ny Kongresy Argentin omaly 30 desambra ny lalàna fanalalahana ny

fanalan-jaza an-tsitrapo hatreo amin’ny faha-14 herinandro dia ny IVG (Interruption Volontaire de la Grossesse), izay efa nolanian’ny depiote ny 11 desambra teo. Tao anatin’ny 12 ora ny adihevitra, ary niafara tamin’ny fandaniana, hoy ny Filohan’ny Antenimierandoholona Cristina Kirchner. 38 no nanaiky, 29 nandà, ary 01 kosa tsy tonga. An’arivony maro ireo mpankasitraka izany no nitotorebika teo anoloan’ny antenimierandoholona omaly. Manodidina ny 300 rahateo ireo fikambanam-behivavy niady mafy ny hanekena ny IVG. 370 000 hatramin’ny 520 000 isan-taona ny fanalan-jaza antsikosoko any Argentine izay misy mponina 44 tapitrisa, ary 38 000 eo ireo vehivavy miditra hopitaly noho izany. Nivondrona teo anoloan’ny antenimierandoholona ihany koa ireo tsy mpankasitraka, toy ny avy amin’ny fiangonana katolika izay manome 62,9% amin’ny mponina ao amin’ity firenena nihavian’ny Papa François ity.