ETAZONIA

Tsy ho kandida i Joe Biden

Any Ivelany
Alatsinainy 22 Jolay 2024

Niresaka tamin’ny tambazotra sosialy X omaly ny filoha Amerikana Joe Biden

ka nilaza fa tsy ho kandida amin’ny fifidianana ny 5 novambra ho avy izao. Nilaza izy fa hifantoka amin’ny famaranana ny fotoam-piasainy. Ramatoa Kamala Harris (Filoha lefitra) no nambarany fa iriany ho kandidan’ny Demokraty ary ho tohanany. Fanapahan-kevitra efa tsy dia nanaitra ny maro intsony satria , tsikaritra ny faharerahana, ny famadihana teny na fehezanteny, ny resaka very tadidy. Novolosan’i Donald Trump ity filoha am-perinasa ity nandritra ny fifanatrehana nifanaovan’izy ireo ary taorian’iny no tena nampiova ny zava-drehetra satria niteraka ahiahy teo anivon’ny antoko demokraty ilay zava-nitranga. Nisy mihitsy moa avy eo ireo lohandohan’ny mpisoron’ity antoko ity niantso ny filoha Biden mba tsy ho kandida.Vao miha nanamafy ny ahiahy ny fahafantarana fa voan’ny Covid-19 indray i Joe Biden ny herinandro lasa teo. Misamboaravoara ny antoko demokraty, ary miha malalaka ihany ny lalan’i Donald Trump hiverina ao amin’ny « Maison blanche » hoy ireo mpanara-baovao politika iraisam-pirenena.
RTT