Any Ivelany

Angletera sy Frantsa Manamafy fiaraha-miasa

Any Ivelany
Zoma 19 Janoary 2018

Nitsidika an’i Angletera omaly alakamisy i Emmanuel Macron hiatrika ny fihaonamben’ny fifandraisana eo amin’ny Frantsay sy i Britanika miaraka amin'ny praiminisitra Theresa May.

Hanamafy fifanarahana vaovao entina hanampiana sy hanavaozana ny efa nisy teo aloha ny fihaonana. Mikendry ny hanohitra ny hamaroan'ny fifindra-monina tsy ara-dalàna any Royaume-Uni amin'ny alalan’ny fanamafisana ny fanaraha-maso avy any Frantsa sy Londres vita sonia tamin’ny 4 febroary 2003 izy ity.

Perou

Hahazo fanomezana manokana ny Papa François

Hanome fanomezana “arc” sy flesy ny Papa François anio ny vondrom-piarahamonina Perovianina iray any Perou raha ny nambaran’ireo solontenan’izy ireo, mba hahafahan’ireo vondrom-piaramonina manantena ny fanampian'ny Papa François amin’ny fakana ny tanindrazany izay efa nohajariany an-taonany maro ka nalain’ny fanjakana Perovianina

Pakistan

Nisy namono ny mpanao vaksinin’ny Polio

Vehivavy 2 miasa amin’ny fandaharan’asa mahakasika ny vaksiny hiadiana amin’ny lefakozatra no maty tany atsimo andrefan’i Pakistan. Tsy fantatra moa izay nahavanon-doza. Araka ny tsilian-tsofina dia ireo islamista no tompon’antoka, satria mihevitra izy ireo fa mpitsikilo nokaramaina ireto vehivavy ireto

EMIRATES

Hividy Fiaramanidina A 380 miisa 36

Anisan’ireo matanjaka sy lehibe indrindra maneran-tany ny kaompaniam-pitaterana Arabo Emirates izay nanafatra fiaramanidina A380 miisa 36 any amin’ny orinasa Airbus izay mitentina 16 lavitrisa dolara. Ny lehiben'ny kaompania, Sheikh Ahmed bin Said al-Maktoum, dia nanombatombana fa hanome lanja ny famokarana A380 izay efa saika hiato . Ireo fiaramanidina ireo moa dia hanoloana ny sasany amin'ireo A380 miasa amin'izao fotoana