Any Ivelany

Afrika Atsimo Nametra-pialana ny filoha Jacob Zuma

Any Ivelany
Alakamisy 15 Febroary 2018

Nametra-pialana omaly ny filoha Afrikanina tatsimo Jacob Zuma. Nanapa-kevitra ny hiala amin’ny maha filohan’ny repoblika ahy, aho na dia tsy mitovy hevitra amin’ny antoko niaviako aza, hoy i Jacob Zuma tamin’ny fanambarana fohy nataony halina.

Nandeha mivantana tamin’ny fahitalavitra tany an-toerana ny fanambarana izay efa nampoizin’ny maro ihany hatramin’ny faran’ny taona 2017 satria be loatra ny olan’ity filoha Afrikanina tatsimo ity na amin’ny fiainany manokana na eo amin’ny fitantanana ny firenena. Malaza ho manao fiainana mpanankarena, mandany volam-panjakana amin’ireo vadiny maromaro sy ny zanany ary voarohirohy amina raharaha kolikoly ny filoha Zuma, hany ka tsy to teny intsony eo anivon’ny ANC. Namadika ny tolon’i Mandela i Zuma ka tsy mety aminay intsony fa manala baraka, hoy ireo mpikambana ao amin’ny ANC. Manankery avy hatrany moa ity fametraham-pialana ity. Asa hoe rahoviana no mba hisy manampahefana mahatsapa tena sy mahay milefitra tahaka izany eto Madagasikara ? Miaiky rehefa tsy mety ny atao dia miala fa tsy miaro tena lava sy manilika ny rihitra any amin’ny hafa foana.