Any Ivelany

Adin’i Etazonia sy Iran Ampoizina ny fiakaran’ny solika

Any Ivelany
Alakamisy 09 Janoary 2020

Tsy maintsy hisy akony amin’ny fanjifana solika eto amin’ny firenena ny gidragidra amin’ny Iran sy Etazonia.

Taorian’ny fodian’ ireo mpiasa amerikanina miasa amin’ny kaompania amin’ny fitrandrahana solika tany Irak sy ny fanambaran’ny Iraniana fa hamaly faty izy dia efa niabo hatramin’ny 4% sahady hatreto ny vidin’ny barila. Efa tratra ny 70 dolara ary voalohany izany nanomboka hatramin’ny mey 2019. Tsiahivina fa eo amin’ny 60 dolara eo hatrany no vidy araka ny tokony ho izy ahazoana ny fifandanjana eo amin’ny tsena iraisam-pirenena (équilibre de marché). Etsy andaniny anefa dia tsy azo tsinontsiniavina ny famokarana solika ataon’i Iran sy ny Emirats Arabes Unis eo amin’ny sehatra iraisam-pirenena izay manome hatramin’ny 21 tapitrisa barila isan’andro miampy ireo mba manana solika kely ihany koa. Efa nanomboka sahirana ny firenena iraniana taorian’ny fahirano nataon’ny amerikana nanomboka ny taona 2018 izay nampihena hatramin’ny 1 tapitrisa monja ny famokarana natao. Amin’ity ady ity izay nilazan’i Iran fa tsy mila fifampiresahana sy fifampidinihina izy fa hamaly faty dia inoana fa efa manana ny politikany ary tsy maintsy hampiasa ny tombony amin’ny maha-firenena mpamokatra solika azy i Iran. Etazonia koa anefa etsy ankilany dia firenena tendan-kanina amin’ny sehatra solika ary tena mila izany. Tsy hisy ny marimaritra iraisana aloha hatreto raha ny toe-draharaha no jerena ary tena ahiana ny fiakaran’ny vidin’ny barila hipaka aty Madagasikara.

Tsirinasolo