Actualités

Tra-doza tetsy Mahamasina 20 mbola tsaboina ao amin’ny HJRA

Actualités
Talata 11 Septambra 2018

Mbola mitana ny sain’ny maro ny loza vokatry ny fibosesehana hiditra ny kianjaben’i Mahamasina hijery ny lalao nifanandrinan’ny Barean’i Madagasikara sy ny Lion du Teranga Senegaley ny alahady 9 septambra teo,

izay namoizana ain’olona iray ary naharatrana 48 hafa. Mbola manaraka fitsaboana ao amin’ny hopitaly Joseph Ravoahangy Andrianavalona Ampefiloha (HJRA) ny 20 amin’ireo naratra, raha toa ka efa afaka niverina eo anivon’ny fianakaviany avy ny ambiny rehefa voatily nahazo fitsaboana fototra ka tsy misy ahiana intsony. Raha ny fanazavan’ny dokotera tao amin’ny HJRA dia tsy misy ahiana intsony ny ain’ireo maratra mbola manohy fitsaboana ireo, eny fa ireo roa niady tamin’ny fahafatesana tamin’ny andro nahatongavany tao amin’ny hopitaly aza. Dona tamin’ny loha no nahazo ny enina amin’ireo, dona tamin’ny tratra ny sasany ary misy mbola amin’ny sampana vonjy aina. Nanamafy ny tompon’andraikitra tao amin’ny HJRA fa raisin’ny fanjakana sy ny hopitaly an-tanana ny fitsaboana ireo niharan-doza teny Mahamasina tamin’io alahady io.

Jean D.