Actualités

Tetikasa “RANO WASH” Hamatsy vola 30 tapitrisa dolara ny USAID

Actualités
Alarobia 01 Aogositra 2018

Nisy ny atrikasa nokarakaraina momba ny Rano Wash omaly talata 31 jolay tetsy amin’ny Hotely Solimotel Anosy.

Io moa dia tetikasa maharitra 5 taona atao any amin’ny faritra Atsinanana, Vatovavy Fitovinany, Alaotra Mangoro, Vakinankaratra, Amoron’i Mania ary Haute Matsiatra. Vatsian’ny masoivohon’ny Amerikana ho amin’ny fampandrosoana iraisam-pirenena (USAID) vola mitentina 30 tapitrisa dolara ary miompana indrindra amin’ny serasera momba ny fiovan-toetran’ireo vahoaka hanaovana fotodrafitrasa ana-rano fisotro madio sy ny fidiovana ary ny fanadiovana. Ao anatin’izay dia misy ny fiaraha-miasa amin’ny sekoly lehibe London School for hygiene and tropical medicine avy any Londres momba ny fikarohana ireo fomba rehetra fanao misy eto Madagasikara momba ny fanovana ny toetra amin’ny alalan’ny serasera. Iaraha-mahalala fa tena vitsy ny Malagasy no misitraka rano fisotro madio, indrindra ny any amin’ireo faritra nofidiana manokana ireo. Araka izany dia 250 eo ho eo ny kaominina tratrarina hahazo fotodrafitrasa lehibe miisa 140 mahakasika ny rano. Rehefa izay dia tombanana ho 3 hetsy eo ny olona hahazo rano fisotro madio vaovao ary 375.000 no hisitraka ny fotodrafitrasa fanadiovana lava-piringa mba hanatsarana hatrany ny sehatra fahasalamana.

Tsiry